噚晚甄子丹，錢嘉樂，陳德森，白冰，王嘉慧等人出席《一個人的武林》首映，首映同時亦幫「香港動作特技演員公會」籌款，今晚大會仲頒咗個「聘書」俾名譽會長甄子丹。

甄子丹話:「今次首映好有意義，見到好多老朋友，好多回憶，我入行30幾年，有啲睇住我大，有啲我又睇佢哋大，有老有嫩，好多人捐錢。」子丹又透露以前拍動作片多數電影公司幫佢哋買埋保險，近幾年先自己買埋，o依家都周身傷，佢話自己都有捐錢，不過幫人唔係講幾多錢，數目幾多又唔代表有幾多心，都係心意。問佢會唔會呼籲多啲人捐錢，佢話:「會，但做善事唔可以迫人，要發自內心，今晚都見到後生武師，今晚都好多人做義工唔收錢，最重要份精神。」

問子丹幾時開工?佢話:「12月先放假，都想比多啲時間睇下小朋友學業，阿仔學緊跆拳道，想同佢哋喺地下碌下，個女學唱歌都想一齊唱。」有冇教阿仔打功夫?佢就話:「未，o依家接觸下比人教下先，會俾啲貼士佢，唔可以講太多，會推翻個師傅。」

咁有冇同個仔對打?佢話有:「同個仔玩MMA(綜合格鬥)時箍住我透唔到氣，教佢對朋友唔可以咁。」阿仔有冇整親?佢話:「都難免，但係會成長。」會否俾個仔入行做打星?佢話:「言之尚早，都唔排除，o依家讀書先。」有冇封佢做偶像?子丹就話個女反而成日覺得除咗功夫，其他方面叻過老竇。子丹喺台上就話:「拍戲32年，經歷3個年代，經歷過淚水，希望繼續有動作演員精神。」