佢係一個歌手，2013年出道，佢叫做葉寶安，2018年，再出道叫做黎俊彥，除咗改名換姓，佢仲來咗一個大變身，猶如真人版嘅《瘦身男女》劉德華。

黎俊彥由高峰期286磅減到人生新低點160磅，再出道係一個賣點，但係重點係，身體出現問題：「係呀！我係2016年減，嗰時其實身體開始出現問題，血壓高，成日頭暈，有時係突然喺街暈，自己好驚㗎，唔知點算，甚至嚴重到瞓覺，突然彈起身透唔到氣，屋企人叫我去醫院check，發現我有睡眠窒息症，開始真係要減，可能人，唔衰過，出咗事先知驚。」

減肥咁成功，呢個過程係點樣奮鬥？黎俊彥話：「我覺得唔係太難，主要係為咗健康，音樂夢亦係一個動力減肥，離開舊唱片公司之後，都有公司、監製搵我合作，我又未ready，以咩形式出來，以前咁出來又冇咩意思，不如索性減肥，只許成功不許失敗，只係齋講冇目標，但係嗰次，係有一個明確嘅目標，我意志又幾堅定。」

減肥有動力，計劃都好重要？黎俊彥：「以我睇咗十幾年營養師嘅經驗，其實年年都係講嗰啲，食物金字塔，塊肉手掌咁大，所以我都係跟營養師，多菜少肉，少鹽少糖少油，唔可以全戒，人唔可以冇呢啲嘢，係要少，甜品唔食得，我啲朋友好鍾意食放題，韓燒、打邊爐嗰啲我都盡量唔出席，我啲friend唔知點解好鍾意呢啲，可能唔駛諗，我同佢哋講，一係轉地方，一係我下次先來，有一段時間我好擔心我冇哂朋友，咁我有啲朋友都ok，肯就我。」

黎俊彥：「有時我出街咪食下啲沙律，宵夜唔食得薯片汽水唔食得，最主要嗰段時間我係全戒澱粉質，我唔食飯，米做，粥、腸粉，麵包，生活習慣改善咗，嗰時我係冇三、四點我係唔瞓，依家我係12點幾就瞓覺，同埋多咗飲水，水對身體排毒，皮膚都好啲，早啲瞓對我哋唱歌把聲都好好多，初初我係飲食加生活習慣改善，嗰時啱啱減係冬天，游水係最好，但係跑步我又怕傷膝頭，冬天又有個籍口，我係3月開始減，後來到7、8月，都減到200磅，就開始游下水，三管齊下，直到1月頭，就減到160磅，大半年到。」

可能每個試過減肥嘅人都會話減減下停咗，咁黎俊彥有冇樽頸位？黎俊彥：「又冇喎！減得好順利，越見到磅數，就越開心，每朝起身都磅，但係有人問我係咪強迫症，我又唔覺係，真係習慣，係不自覺地上磅，今日重咗就嗰日食清啲。」減肥過程係辛苦，但係見到成效，一切都係值得：「輕盈咗，嗰時行街，一陣腰攰，膝頭會痛，依家呢啲係完全唔存在，但係唱歌，嗰時肥啲確係夠氣啲，所以話肥人係好夠氣，依家減完係要適應，可能我減得快，120磅，所以到依家，我係未太適應唱歌嘅運氣，所以依家我做gym，做番啲肌肉頂下個丹田，著衫又會靚啲，希望係唱歌可以提升番。」

至於大半年286磅減到160磅嘅秘訣係咩？黎俊彥話：「一個明確嘅目標，講咗好多次減肥，但係冇目標，今次係我健康同音樂夢，當下係一個好大嘅人生目標，所以我就做好佢，我咁大個人冇一個明確目標，同埋意志，我都曾經有掙扎過，有一次想打開包花生，就有魔鬼同天使出現，突然叮一聲，將意志變成習慣係一件好事，香港好多美食，到依家見到好嘢食，唔會買來食，齋講，意志變成習慣，唔會變成折磨，順理成章，變成習慣。」

採訪：楊潔雯、張家倫
攝影：陳俊強、沈健程
攝錄：廖達燊
場地：FAC Sportagon
服裝：Dusty

精選娛聞，喺晒《娛果》
http://fb.com/appledailyent