當年今日
關於我們

【短片】【演好每個角色】阿Sa失落影后 阿嬌撐好姊妹心情OK

蘋果日報 2015/04/20 06:00

蘋果阿Sa阿嬌影后角色心情即時OK失落演好每個撐好姊妹

蔡卓妍(阿Sa)噚晚於第34屆香港電影金像獎頒獎典禮,不敵演技派趙薇,最終失落影后寶座,不過阿Sa憑住《雛妓》嘅突破性演出,都值得好好慶祝吓。

今日凌晨12點幾左右,阿Sa相約爸爸、經理人Mani、阿嬌(鍾欣潼)及工作人員等二十多人去九龍城方榮記慶功,阿Sa爸到場時,問囡囡攞唔到獎,有冇少少失落,Sa爸表示:「冇呀!冇呀!」

好姊妹阿嬌都有嚟,問及阿Sa心情如何,阿嬌話:「佢OK!」笑言阿Sa未食嘢覺得好肚餓。阿Sa接受訪問亦笑指:「好肚餓,餓到爆炸,出嚟就話唔得喇,要去打個邊爐先,其實我已經覺得好窩心,尤其剛才大會播出提名片段,聽到好多歡呼聲及掌聲,嗰一刻眼淚想湧出嚟。」阿Sa被問有冇失落,佢就講:「冇呀!無論有冇獎攞,可以入到圍已經好感恩,覺得行到呢一步,付出好大努力,其他得獎者男演員及女演員,我都好戥佢哋高興,輸得心服口服,係實至名歸。」不過一問及男友陳偉霆,朋友即幫阿Sa解圍,未有提及男友有冇安慰佢。

另外,阿Sa噚晚亦喺微博貼出行紅地毯嘅相,留言:「能夠走到這一步已經佷感恩了,謝謝所有支持我的前輩和朋友⋯謝謝一路上有你們⋯我會繼續努力演好未來每一個角色。」