由唔少政商富二三代組成嘅香港菁英會今晚舉行第11屆執委會就職禮，特首林鄭月娥同大批特區高都現身撐場，上屆有現身嘅前特首梁振英今日未有再露面。娥特則喺致辭時，與同場嘅中聯辦副主任陳冬對話，話陳冬早前話林鄭過去一年出席差唔多30場青年活動，娥特即場澄清：「其實比30場要多了，陳冬副主任，你看到的都是一些公開的，還有很多是未有公開的」。

娥特又話，自己對青年人是「有求必應」，希望未來做到「有事必辦」，但佢會後離開時被問到點睇中大學生會會長今日喺開學禮致辭時提到港獨問題時，娥特不作回應就走人。陳冬台上發言時，除咗肯定娥特上任後一直與青年人「同行」，發言時亦提到「希望大家更加堅決地反對和抵制一切港獨分裂言行」。

今年連任菁英會主席嘅莊家彬致辭就話，近年香港社會出現一啲「雜音」，話有啲「別有用心的人」喺青年社群裏散播所謂港獨主張，話對於呢啲「歪風歪理」，菁英會堅決反對同抵制，未來將積極搭建不同平台，畀青年人「正確認識」當今社會同國家發展，增強青年人對國家的認同感和歸屬感喎。