香港足球代表隊噚日喺傑志中心開操，準備柬埔寨同新加坡呢兩場友賽。早前左膝十字韌帶受重創嘅歐陽耀冲當然歸咗隊，而教練金判坤收操後除咗話想睇歐冲表現，亦自爆唔滿意基藍馬，所以今次唔選佢，仲暗示隊長陳偉豪嘅港足生涯到咗尾聲㖭。
港足今次選咗23人，大軍今朝早就飛去柬埔寨。除咗歐冲獲重召，佢位中甲貴州恒豐智誠隊友法圖斯亦有份，歐冲話早前踢中協盃，左膝十字韌重創，好在未斷晒，唔使做手術，經治療後已復操同踢過幾場預備組，𠵱家有七八成狀態，應付到呢兩場港足友賽，但因為有少少拉傷，噚日冇跟大隊操。
Kim sir話港足需要新血，呢兩場想畀機會歐冲，睇睇佢表現：「歐冲可以踢進攻中場或翼鋒，佢同黃威係本地比較少有具創造力嘅球員，但佢啱啱傷完，今次唔會逼佢。」

唔滿意基藍馬踢得差

問到陳偉豪、李志豪同陳肇麒點解冇入選嗰陣，Kim sir就話會重召陳七踢下月喺旺角場嘅東亞盃第二圈，但虎哥因私事繼續缺陣，偉豪過去為港足貢獻好多，但港足要向前看，諗緊點樣以最漂亮嘅方式畀佢告別。另外，Kim sir今次唔選基藍馬，係因為對入籍球員要求較高，但佢上次友賽柬埔寨表現差，今次就唔預佢囉。