眾所皆知，警隊有拜關帝文化，每個警署都會供奉關帝，但有一間警署例外，就係黃大仙警署，呢間警署供奉嘅正正係黃大仙。噚日黃大仙警署搞咗嗰拜黃大仙嘅晉升典禮，仲邀請黃大仙祠嘅道長誦經祈福。黃大仙警區指揮官曾艷霜同八方講，呢個拜黃大仙儀式唔係每年都搞，由於今年呢間警署有17個夥計獲晉升，大豐收喎，決定由獲升職嘅夥計同警署高層夾錢舉行拜黃大仙儀式，連前警隊「一哥」李明逵都有到。
曾任職警隊嘅嗇色園董事會主席馬澤華話，拜黃大仙同拜關帝都要有燒豬、雞、生果同上香等儀式，但前者會由黃大仙祠嘅道長誦經膜拜，後者只有燒關帝衣，儀式比較簡單。

前一哥李明逵湊熱鬧

講番黃大仙警署供奉黃大仙嘅歷史，曾艷霜話源於1964年，當年區內治安不靖，雖然有關帝坐鎮，但都鎮壓唔住，有警署高層認為喺黃大仙區應拜黃大仙，遂請黃大仙到警署坐鎮，又派人去黃大仙祠度將黃大仙嘅形象畫落嚟掛喺警署大禮堂供奉，禮堂亦改名為黃大仙廳，治安果然好咗。關帝就改為擺放喺CID房供奉。而供奉喺黃大仙廳嘅畫像，據記載出自當年警署一名負責畫素描拼圖嘅警員手筆。

呢嗰拜黃大仙儀式除咗吸引東九龍總區指揮官張靜同區內警隊高層外，亦有西九龍總區指揮官卓孝業、商罪科總警司曾正科、荃灣警區指揮官陳樂榮等。八方更發現一位稀客，就係前警隊一哥李明逵，佢同八方講當咗幾十年差都未見過拜黃大仙儀式，所以有舊部邀請佢嚟就欣然答應，曾經駐守沙田警區嘅佢話，就算沙田警署都係供奉關帝，並無供奉車公，只有黃大仙警署供奉黃大仙。八方問李Sir警署乜嘢情況下先舉行拜關帝儀式，佢幽默咁話：「升職會拜，破到大案亦會拜，破唔到案更要拜（關帝）。」

李八方