方力申﹑鄧麗欣（Stephy）﹑羅孝勇及港台一班DJ等，噚晚喺九展出席港台活動《家‧多一點愛》感恩大會。

小方同Stephy以大使身份出席，活動主要宣揚向家人多講我愛你，Stephy喺台上表示：「同家人係好保守，第一次同家人講我愛你，係喺2007年自己演唱會上，向咁多觀眾，同媽咪及家人講我愛你。」

司儀又問小方，點樣先係一個示意愛的感覺？小方即拖住身邊男主持，又話拖手可以代表愛的一種；其間司儀提議講我愛你，但小方冇同女友講，仲反問：「乜唔係佢講畀我聽咩？」之後佢哋喺司儀帶領下，同觀眾大聲講我愛你。

小方及Stephy一齊接受訪，Stephy表示呢三個字（我愛你）好難講出口，講英文會好啲，廣東話就難搞啲，不過佢0依家仲好記得，第一次聽小方同佢講我愛你：「當時感覺係想喊同好感動，個感覺係終於講出口，終於都聽到。」

咁係乜嘢情況下講呢？Stephy謂：「係一個慶祝活動，當時有個蛋糕，唔記得係乜嘢日子，但記得係一部電影煞科，感覺都幾Sweet，佢專登買個蛋糕同我慶祝。」
此時身旁小方默不作聲，記者笑佢唔搭嘴，係咪唔記得件事，小方就話：「咩呀？我成日都講嘛，你哋明唔明呀？」

問Stephy當時點樣回應嗰句我愛你呢？Stephy笑言：「嗰句之後，我講句Metoo﹗」問小方0依家同Stephy係咪「老夫老妻」，所以少講我愛你？小方謂：「唔係，我成日都講，但講英文多啲。」Stephy就話：「都想好似外國人咁Open啲，成日都想學佢哋嗰種感覺，可以日日都講一次。」

小方續說：「如果喺呢個世界，識得講多謝﹑我愛你及對唔住，呢個世界變得更美好。0依家同父母相處，就算一星期有三日同佢哋食飯，佢哋都會嫌少唔夠，有時會問我，星期日唔係放假咩？縱使我做咗十幾年，家人都會咁問我。」

問兩人係咪家人鍾意見到佢哋多啲呀？小方話：「都想0架，咁我哋有時間都會陪對方屋企人食飯。」Stephy則說：「自己同媽咪一齊住，但好多時各顧各，佢好多時提醒咗我。有時約食飯，會約埋我家人一齊。」小方笑言：「你哋知唔知點解本身有六舊腹肌咁快冇咗？因為我每日十二點，先同Stephy家人飲茶，然後我屋企人飲茶同食嘢習慣就兩點鐘，所以每日飲兩餐茶。」