中旅(308)既係現金牛,PB又吸引,有得諗。中旅現價1.43元,同最近八年低位,唔係相差好遠,相對NAV2.3元折讓38%,喺07年中資股熱炒期,中旅無折讓,PB兼上到兩倍水位。再講,中旅手頭淨現金近27億銀,係超級現金牛,再風大雨大,中旅都頂得順。又中旅經過09同2010年度(12月底止)大額折舊期呢項成本增加影響,加埋就部份經營欠理想嘅項目投資撇晒賬,執到靚靚仔仔,2011年度純利,就彈番上6億銀樓上。而集團主打酒店業,呢期應該Keep住穩步增長,喺中線進一步享受祖國旅遊業務爆升期前,已經可以支持到2012年度業績,純利係咁意增15%到近8億銀,PE得10倍。中旅現價翻半番到2.15元,預期PE不過15倍,唔係貴。