自從雷神莫雷拉連贏三屆香港冠軍騎師，港人對巴西的印象不在局限足球。周三晚(6日)浪琴表國際騎師錦標賽，有副來自森巴的新面孔，年僅18歲的巴西卡夫雅冠軍騎師韓偉傑(Leandro Henrique)，兩年前才正式出道，短時間內竟狂贏逾430場頭馬。

韓偉傑不黯英文，今次訪港由說得一口英語的巴西見習騎師校長Mayra Frederico負責即場翻譯。

問：今屆賽事12位騎師之中，你係全場最後生，今場係你首次喺亞洲地區上陣嗎？

韓：係，今次係我第一次到巴西以外地區上陣，今早(5日)我在沙田馬場為沈集成操馬，真係大開眼界，我長期係里約熱內盧策騎，最明顯嘅地方當然係方向，香港賽事右轉，里約熱內盧馬場係逆時針方向，而且晨操唔會咁熱鬧，好多時場內只有1、2匹馬出操。

問：今屆賽事強手林立，莫雅、布文等都係備受推崇嘅騎師，你最期待同哪一位騎師較量？當中有冇騎師，你一直都欣賞？

韓：我發夢都諗唔到自己會同全球最出色嘅騎師較量，特別係我第一次同偶像莫雷拉同場比賽。呢一朝，我係第一次見到佢真人，非常興奮。莫雷拉飛亞洲發展時我只8、9歲，仍未學識騎馬，但巴西馬圈人人都讚莫雷拉工作態度認真嚴謹，呢份態度令我意識到，如果要成為最出色嘅騎師，就一定要認真看待自己嘅工作。莫雷拉嘅成功啟發到我哋新一代騎師，我哋紛紛參考他及蘇兆輝嘅工作態度同騎姿，因為佢哋係專業騎師嘅典範，大家都好想好似佢哋咁成功。