【重返樂壇】海俊傑坦言做人唔使發達 ︰有個好老婆就夠
蘋果日報 2019/09/06 16:15
海俊傑葉巧琳
攝影：盧妹
海俊傑和葉巧琳今日分別到商台宣傳新歌，相隔7年再推出新歌《長大》的海俊傑，心情興奮：「廿幾年冇正式上電台宣傳，感覺好像新人咁。首歌反應好好，因為香港而家氣氛唔太好，首歌都好正能量，不過都有藝人朋友同我講，呢個時候出歌會唔會唔係好時機，但係首歌已錄咗幾個月，我都唔想再拖。」
他表示新歌歌名，靈感來自師姐鄭秀文的《我們都是這樣長大的》：「因為我有翻唱佢首歌，佢又repost咗出嚟，大家首歌都係講成長，所以就用咗呢個歌名。」問到他的工作可有受社會氣氛影響？海俊傑坦言一定有影響：「無論係喺香港定內地住嘅藝人都有影響，我就唔係因為企邊邊，所以冇話取消，但係有延遲囉，我只想香港好，國泰民安。」海俊傑透露已錄好三首歌，當中更有一首是合唱歌：「應該明年先再出歌，想畀多啲時間大家消化下先。」他表示有意明年開騷，現時會努力造歌出碟。
問他最近忙於宣傳，太太可有投訴？海俊傑說：「太太見我重返樂壇做歌手，都覺得好值得，冇投訴，佢仲幫我share新歌出去。佢係天才小廚神，有時我呢個大爺話想食咩，佢就即刻上網揾下點整，仲要真係好好食。我真係幸福到不得了，做人唔使發達，有個好老婆就夠。」
此外，葉巧琳今日到商台宣傳新歌《一對一》，她指新歌是「小黃歌」感覺性感：「我都係啱啱先知有呢個詞，因為首歌係幾個女仔講bra做主題，所以可以有好多聯想，我自己都係第一次做sexy嘅歌。」
她透露早前為新歌拍MV，邀得戲劇班同學擔任MV男主角：「係我主動邀請佢嘅，諗住同學冇咁尷尬，同埋都係戲劇交流。」葉巧琳指MV中很多埋身的親密動作，有辣身舞、有床戲，但提到親吻鏡頭，她說：「我哋係借位嘅，因為想留番個螢幕初吻先。男朋友都講過唔好錫，佢話如果我有日拍戲，做超級大主角，再要睇埋邊個對手，就有可能畀我錫啦。」
葉巧琳指新歌MV會於今晚推出，男朋友早前看部分片段，已有少許微言：「佢咁啱睇到我除衫嗰幕，不過佢都話會成個MV睇一次，我準備好從旁『家長指引』佢。我同我啲朋友都好期待個MV出街，相信唯一唔期待嘅係我男朋友。」問她為何不邀請男朋友做MV男主角？葉巧琳坦言不想太公開：「佢又唔鍾意出鏡，唔好拖佢落水。」
採訪、攝影：盧妹
海俊傑近日忙於宣傳，幸老婆沒有投訴。
他直言有個好老婆好過發達。
葉巧琳笑指新歌好性感。