港股上禮拜五跌得好勁,成交大增,期指未平倉合約有利淡啓示,今日係期指結算前夕,好淡雙方都會作最後階段搶攻,不過,𠵱家睇起嚟,淡友有啲優勢。
話個市跌得好勁,唔會個個人同意,兩萬點指數,跌388點,都唔夠兩巴仙,算得係乜?啱嘅,喺呢個角度睇,俊樺完全同意,不過,話個市跌得勁,係講個「勢」,唔係講跌幅。恒指高位見咗兩支陰燭之後,突然裂口下挫,成個「島」壓落嚟,大成交,以及期指未平倉合約幾日嚟嘅變化,都令人唔係好放心,說時遲那時快,大摩吹奏一曲摩笛,話港股貴咗成半至三成,呢個時候講啲咁嘅嘢為乜?大摩啲「摩笛追魂」,真係好似食海鮮咁,日日唔同價,冇幾耐之前先至講今年港股低位喺18100水平,轉過頭就話恒指合理價應該喺15600至17600之間,俊樺唔係好明,你呢?
花旗呢個禮拜議息,經濟數據同油價令投資者憂慮聯儲局唔會減息,美股借勢回落,議息之前,油價會繼續影響美股。睇番幅圖,油價呢兩三日仲有機會上番啲,現已升破55美元,如果炒家趁減息前做嘢,有機會炒上去58、59美元嗰頭,油價短線可以睇好啲,但股市就好可能因為咁受壓。