近日韓國娛樂圈掀起新一輪「2018冰桶挑戰」，呼籲大眾關注漸凍人症嘅「肌萎縮性脊髓側索硬化症」(ALS)病人，及支持韓國興建首個肌萎縮性脊髓側索硬化症嘅療養院，已經有多名藝人參與。

今年2月因甲狀腺機能低下症而停工休養嘅女星金裕貞，亦被點名參加冰桶挑戰，不過佢就以捐款代替淋冰水嚟支持行動，並喺Instagram公開自己捐咗210萬韓圜(約1.5萬港元)嘅善舉，希望外界更關注漸凍人。

另外，韓國型男鄭雨盛今日喺Ig拍片表示畀男星呂珍九點名接力參與「2018冰桶挑戰」：「佢點名當時我正喺海外，未能即時作出回應。之後我搜尋冰桶挑戰嘅規則，發現被點名嘅人24小時內未接受冰桶挑戰，便要捐款畀相關組織。」鄭雨盛隨即表示已經捐咗錢，更即時淋冰水力撐行動。

更多韓流，喺晒《娛果》
http://fb.com/appledailyent