李斯特城雖然喺禮拜六作客晏菲路場波輸1:2，但係今場波幫客隊先開紀錄嘅射手占美華迪依然有貨交，仲繼續刷新一項自己登陸英超以嚟嘅紀錄！

占美華迪喺上半場三分鐘嘅入波，係佢職業生涯第51個英超入波。聽落的確唔算多，但華迪51個入波當中，有22球，即係43%，係喺面對所謂傳統Big 6球隊（阿仙奴、車路士、利物浦、曼城、曼聯同熱刺）果陣射入嘅。呢個統計，自從占美華迪喺2014/15球季登陸英超以嚟，比所有球員都要多。

另外，喺Big 6對手當中，最怕見到占美華迪嘅應該就係利物浦。事關佢喺禮拜六嘅入波，已經係四季以嚟嘅第七球，紅軍亦係占美華迪入波最多嘅對手。其實，喺英超史上，只有曾經效力紐卡素同曼聯嘅射手高爾（11球）同前阿仙奴前鋒亨利（8球）曾經喺利記身上取得更多嘅入波。

--------------------
BFB CHAMPIONS 2.0 聖誕新年活動連環出擊，登入即送傳奇球星「林伯特」！ http://bit.ly/2xrTKGM