港股噚日早段受中石油（857）「披成」集資逾200億元影響，恒指曾再跌穿14800大關，但低位有承接力，午後反覆回升，收報14903，跌18點。
大市跌到14734後反彈，暫時都係上落市格局，噚日係第一次再試14800支持，日後唔排除會試多一兩次，若守得住，整固完成後，有機會再向高位推進。
賭股升後回氣，但嘉華孖寶就繼續放領，嘉華建材（027）重上6元大關，升5.2%，嘉華國際（173）收2.875元，升4.5%，今次衝破長達4個月的大圓底頸線阻力，且有大成交配合，照度上去，短期目標3.20元。
濠股呢輪有番啲生氣，遠東發展（035）在澳門嘅龐大綜合發展項目，短期內會動工，總投資28億元，首期4間酒店07年10月可提供服務，每年可為集團帶來數億元收益。

預測PE僅7.3倍

遠展旗下瓣瓣業務都好掂，本港嘅酒店好旺場，平均房租已較去年升15至20%，今年內重會有3家新酒店開業，房間增至1700間。以旗下位於大角嘴的帝豪奧運為例，直至12月的房間預訂已全部爆滿，平均租金亦由淡季的300多元增至500多元，平均入住率更達98%。
內地地產方面，雖受宏調影響，錦秋加州花園銷情略為放慢，但集團今年售樓目標可按計劃完成，售價仍較去年升5%，預計今年回籠資金達10億元。
現年度（3月年結），遠展盈利估達6.5億元，升62%，每股盈利0.46元，預測PE只為7.3倍，可換股債券行使價4.06元，可作為短期目標價，摩根大通報告則睇5元。
郭兆誠