雷神即係雷神，今晚第三場一接手「大把世界」即贏，馬主全勝團體成員包括馬會前主席陳祖澤及兩位現任大董周松崗、郭志桁，而雷神個人連勝五日未斷纜。此駒上季全線守齋，今季亦原本逢出必輸，不過今場雷神出馬卻如有神助，沿途走外叠生位，蝕啲都唔怕，最緊要走得順唔受擠碰，結果拉士一鼓作氣衝贏「中環英雄」同「跑贏大市」，打開今季勝利之門。
雷神咁騎得，自然係萬能插蘇，同邊個倉主都可以擦出火花，佢同徐雨石繼「盤滿鉢滿」後，連續第二次合作數糊，後者自然錫到佢燶！呢場四班一哩賽事成為團體馬天下，「大把世界」與「中環英雄」及「跑贏大市」三匹同類分子包辦近四千六百蚊三重彩。