小小超李澤楷鍾意做傳媒大亨，咁當然要招兵買馬；而現有班底之中，八號仔頭號猛將蘇澤光，聽講可能傾掂數，唔會走住。
Jack蘇本來係地鐵主席兼行政總裁。佢做過股票做過銀行（新鴻基銀行，同美林合作，好威㗎），又做過高官，可謂周身刀，唔知點解老董唔睇佢枱戲，將地鐵主席同總裁一拆為二之時，唔肯畀佢做主席。咁Jack蘇吞唔落呢啖氣，咪劈炮囉。三年之前，佢轉投小小超旗下，做咗副主席，同袁天凡同級，踢走阿「屠夫」。兩年幾時間，八號仔又真係時來運到，搵到大陸網通入股，又做番手機，本地電話生意止跌回穩，檔now亦有聲有色……

兩鐵合併首選主席

不過，阿Jack三年合約今年七月屆滿，早前電訊界以至鐵路界都盛傳佢會拜拜，仲話特區改朝換代之後，人事激變，田家二公子由明日之星忽然跌落谷底。唉，鬼叫佢阿哥話人隻手遮天咩，而佢自己同九鐵又一鑊泡，所以不時有人話，兩鐵合併之後個主席位一定唔會畀田二少做，咁搵邊個？咪Jack蘇囉。
八方上個月尾在將軍澳電視城見過阿Jack。佢當日出席八號仔同TVB合作將新電視八個台放在now播嘅儀式。當時佢在電視城八面威風，似足傳媒中人，其實佢仲係電影委會主席，非常啱阿澤楷嘅新路線，因此佢留低一啲都唔奇。而且，網通現在係八號仔第二大股東，聽講阿Jack啲普通話講得好好，北方班老細對佢印象都唔錯。你話貿貿然換舵手，如果網通唔高興，都幾煩。
仲有，八方觀察到早幾個月，Jack蘇嘅曝光率非常之高，呢個情況通常都係一個訊息──嗱，想搵人呀，搵我啦。但最近佢又回復低調，你話箇中有乜玄機？以七月約滿計，扣咗假期可能五月就走得，佢走唔走呢個謎，好快就揭盅。今個月二十九號八號仔派成績表，到時大家一定會見到阿蘇生，記得問吓佢。


爆料熱線：29290000、27860099
報料傳真：26239278
報料電郵：[email protected]