馬主H嘅公司七年前買咗一部叫做先進嘅影印機,影印機一向運作良好,但過咗五年之後,影印機代理商話部機已經過時,零件難找,每年保養費要收四千元。明年進入第八年,代理商拒絕再保養。馬主H心諗部機如果跪低,都會幾麻煩,代理商嘅營業代表乘機上門游說,奉上優惠,話明原機收回,新機打折,贈送免費保養五年,條件甚為吸引,一㩒計數機,就知道制得過。於是好快就成交。
營業代表(俗稱Sales)又講:「付帳方法,任君選擇,公司支票啦、現金啦,我哋甚至為客人設想,幫佢哋儲蓄mileage,可以用個人信用卡簽帳。」咦,架機淨價賣兩萬幾銀,大消費項目噃,簽卡可以攞番成三千哩,有乜唔好?原來代理商摸透客戶心理,徇眾要求,順應市場需要,呢間公司抵讚。