練馬師David霍利時剛戰憑「君臨大地」贏馬，唔經唔覺，霍利時已由南非來港開倉14年，回顧2003年，佢以「查士丁尼」由馬安東經手，贏出馬房在港第一場頭馬，馬主正是馬會現任名譽董事黃頌顯（曾任馬會主席），亦即係與「情趣」等駒同主。

「查士丁尼」嗰次取勝，正正就係2003年9月13日，眨吓眼就14年過去，今日乃2017年9月13日，響呢個紀念性日子，「情趣」將跑今晚快活谷第六場三班1650米，隻馬上季最後一仗同班同程贏得輕鬆。

今次季內復出揀正此程，做足備戰工夫，雷神莫雷拉肯騎，仲要有3檔好位，睇嚟霍利時同黃頌顯呢位忠實支持者，可在14周年紀念日，再次雙雙殺入凱旋門。