香港賽馬會慈善信託基金喺98/99年捐款1.02億成立為期十年獎學金,資助成績出眾中學生大學學費共29萬元,唔經唔覺10年期屆滿,今年延續多一年造福學子,據講呢個計劃應該會添食,明年繼續頒落去。
理大眼科視光學系二年級生梁嘉欣,噚日獲頒呢個獎學金,佢高考成績一般,原本可以隨便揀啲「水泡」科目入大學,但佢志願係做視光師,寧願花多啲時間,先讀副學士,之後再憑佳績獲四間大學取錄,仲包括港大,但佢為咗實現夢想堅持入讀理大視光學系,希望將來做個視光師。至於城大嘅陳子翔亦都獲得呢筆獎學金,表揚佢義務幫內地來港留學生補習廣東話,其實佢講嘅廣東話都唔係好正宗本地口音,不過勇氣可嘉,抵佢攞獎。