加息唔多唔少會削弱投資意欲，不過舖市依然熱炒，旺角弼街有個舖，竟然兩日內賣三轉，合共升值一成半，不過買家身份有點撲朔迷離，最好以土地註冊處登記為準。
話說弼街八十至八十四號地下F舖B部份，七百呎，由金百合餐廳以每月六萬二租用，投資者蔡伯能，前日用二千五百五十萬買入，噚日中午就傳二千八百五十萬摸出，噚晚再以二千九百五十萬摸多一轉，接貨嘅係石鑑輝有關人士。
聽聞，呢單極速摸上摸由恒業操刀，不過恒業同蘭西講，買家同石鑑輝冇關，至於點樣可以一日成交兩次，恒業冇詳細解釋，只係話，買舖唔同買住宅，摸貨唔使畀釐印，只係畀經紀佣，所以中間嗰轉，投資者重可以濕吓腳。
美記標售嘅尖沙嘴北京道十六號A地舖連閣樓，噚日有三支標，最高嘅出價，接近業主意向億六、七，不過，要一年成交，所以業主未即時答應。市傳英皇楊受成傾到億六，亦有機會勝出，不過英皇有人否認入過標。
中記話，遠至屯門青海圍六號地下I及J舖，由銀行揸住收租，暗標收到九支咁多，成功以最高標價一千五百二十萬賣咗。

栢濤灣開賣在即

長實西貢栢濤灣等咗幾年，最近睇準時機轉租為售，高級營業經理袁添鴻話，兩周賣咗十七個分層（栢濤豪苑）同一間獨立屋（栢濤灣），套現四億一，呎價八千五，頂層連天台呎價萬一，分層已經售罄。
栢濤灣租約期滿，可以交吉洋房重有十二間。袁添鴻話，示範屋下月中竣工，到時會首推四座洋房。洋房分三類，山景售二千八百萬至三千萬；海景三千五百萬至三千八百萬；最貴嘅泳池董事屋，近四千三呎，就要五千萬至五千五百萬，呎價過萬二。另外，首兩名洋房買家，港置送遊艇駕駛課程，總值四萬八千八。

施工紙減七成四

住宅供應係咪短缺，從政府批出嘅施工同意書，興建單位數量，可知一二。
利記周滿傑話，今年頭四個月，共有九個住宅項目，獲得政府批出施工同意書，合共只係一千六百五十九個單位，比起舊年同期嘅近六千五百個，大幅減少七成四。
周滿傑估計，全年批准施工嘅住宅，數量少過一萬個，形成未來會出現住宅房屋供應短缺嘅情況。
呢個結果有乜意思呢？答案係，佢認為政府應降低勾地底價，或者恢復定期賣地，令到長遠有穩定嘅土地同房屋供應，減少樓市波動。

加息有利好副作用

啲人重建買樓信心，加息後嘅樓市動向，自然備受關注，大和證券日前搞嘅午餐會，請咗美聯董事謝梓旻同首席分析師劉嘉輝做嘉賓，咁內容梗係離唔開樓市啦！
謝梓旻指出，炒家喺三月轉炒二手樓，搞到二手住宅成交比例高達九成四，去到一個嚴重不平衡嘅比例，加息會加快二手成交調整至合理水平。
佢舉出集團嘅研究數據為例，過去一周，全港三十五個二手屋苑嘅成交量，已比之前一周少咗三成。至於第二季，一手成交量預料較首季增加五成，二手就減少兩成三。
另外，謝梓旻話，集團維持預測，今年一手成交量有二萬五千五百宗，同舊年相若，樓價會上升一成至一成半。二手就有一成增長，達到八萬五千宗，造價則會上升三成。
電郵地址：[email protected]