煲呔出訪美國，見唔到布殊總統，梗係有啲唔開心，好彩，佢旁邊兩位女將，新聞處處長蔡瑩璧同駐美經貿專員韋玉儀為佢抹粉，猛話煲呔喺美國好受歡迎，好多人排隊要見佢，但係唔招呼得咁多。
煲呔日前同共和黨眾議員海德會面鬧出羅生門，煲呔就話人哋歡迎政改，重話對方個助理都同意，但海德就向外國通訊社孖叉政改做得衰。噚日八方終於拆到局，原來海德唔滿意煲呔「講大咗」，所以佢喺會面之後，透過幕僚派稿畀美國國會記者，澄清立場，唔好畀外界以為佢支持委任制。
有外國行家同八方講，海德一早預備好同煲呔會面嘅講稿，但係海德因為眾議院表決時間長咗，同煲呔會面剩低十分鐘，所以冇照稿讀，佢重話，篇講稿除咗媽叉政改，重批評港府唔畀馬英九嚟香港㖭！

傳真︰2623-9278
電郵︰[email protected]