【新增影片】
曼聯禮拜日喺主場迎戰同市宿敵曼城，呢場唔單止係曼市打吡，同時亦都係榜首大戰。呢場波賽前多新聞就係意料中事，其中紅魔鬼領隊摩連奴就炮轟曼城嘅哥迪奧拿，批評呢位西班牙籍領隊唔誠實喎！

話說哥帥喺禮拜三作客烏克蘭鬥薩克達場波無帶大衛施華出征，仲喺歐聯賽前記者會話施華未必踢得曼市打吡，不過摩佬就話打死都唔信喎。四日前曼聯作客阿仙奴場波，兵工廠領隊雲格賽前亦都話前鋒拿卡錫迪唔踢得，但係呢位法國射手最終亦有上陣。

當被問到曼聯嘅傷兵情況時，摩佬就話：「你想聽真話係咪？真相就係艾歷拜利肯定唔踢得，菲爾鍾斯有機會、費蘭尼都係。伊巴謙莫域嘅機會再大啲，尼曼查馬迪有傷，但肯定會踢，不過卡域克就唔使諗。我只係會講真話，唔會作果啲好似拿卡錫迪或者大衛施華嘅故仔。我哋嘅對手總係咁嘅，個個球員都有好多嚴重問題，但最後個個都會上陣，呢啲球會好犀利。當我哋有問題嘅時候，全部都係嚟真㗎囉，我話佢哋傷咗嘅時候，係真受傷囉，我只係會講真話！」

--------------------
係你！打造星級球隊，征服各地聯賽！立即加入『BFB CHAMPIONS 2.0』！ http://bit.ly/2xrTKGM