歐錦棠噚日為音樂劇《馬丁路德》作最後兩場演出，佢喺下午場時就唔小心跌斷左手，完騷先去醫院睇醫生(新聞連結： http://bit.ly/2xeGS9q )，本來醫生勸喻佢要休息，但阿棠敬業樂業，堅持the show must go on，頂硬上簽紙出院，繼續返去舞台，忍痛做埋晚上演出。

阿棠今朝立即去咗睇骨科，下月仲會同老婆萬斯敏喺上環文娛中心三度公演《男女PK大作戰（激笑版）》，阿棠唔想影響演出。

阿棠凌晨喺facebook留言多謝醫護人員，《蘋果》今日打畀阿棠，佢話啱啱睇咗骨科，問到佢噚日受傷經過，佢話：「真係意外，我呢次演出，有一part單人跳現代舞，其實之前綵排都覺得舞台好『啜』腳，我先係左腳拗柴，跟住我再跳時比較留神左腳，重心就放咗喺右度，有個動作要跳起，我落地時左手輕傍住，『啪』咗一聲，左手都拗咗後面，甩咗骹。」劇組送佢去急症室，本來醫生叫阿棠要留院一晚，翌日安排骨科駁骨，但因為唔想影響演出，阿棠堅持自行簽紙出院，結果佢駁番骨出院，繼續返去演埋夜場。

阿棠話：「駁番骨，我包住手，着埋戲服，我略為修改動作，好多人可能覺得我咁係好戇居、好傻，但我係唔會諗呢啲。」噚晚喺醫院，醫生話阿棠左手有碎骨，但今日佢再去睇骨科覆診，醫生就話佢噚晚駁得好好，冇碎骨，o依家打咗石膏，仲換咗個纖維托，阿棠話：「大約要幾星期先可以好番，好番仲要做物理治療。」連埋左腳拗柴，噚晚傷左手，阿棠自嘲：「呢次真係『阻手阻腳』，o依家家連褲都着唔到，要老婆幫我，辛苦佢照顧我。」阿棠又話左腳傷好咗八成，希望早日康服，再投入新戲綵排。

此外，張崇德亦回覆《蘋果》就話：「當時場面係我同棠哥合唱，佢喺後面約7米高樓梯行落嚟，然後我伏低後，佢會喺我身邊跳舞同有很多形體動作，由於係第四場，已知道佢嘅走位，突然間聽到一吓好大聲嘅啪一聲，因為我仍要繼續做戲，所以後來先知咁大件事，佢喺我間房嘅門口，等十字車，我當然很擔心，但佢仲同我講，崇德，唔好擔心，搞到你唔好意思，唔好影響你做戲。棠哥除咗係好專業嘅演員外，仲顧及整個劇，佢仲諗場戲冇咗佢點算。」崇德祝願棠哥早日康復。