日籍男星藤岡靛（DEAN FUJIOKA）早年曾喺香港及台灣發展，較為人熟悉係拍過何韻詩嘅《勞斯.萊斯》MV，近年佢回流日本發展，憑住晨早劇《阿淺來了》爆紅，近日忙於宣傳新片《結婚》嘅佢，前晚亮相TOKIO清談節目。

藤岡靛於節目談到自己當年畢業之後，曾經窮遊亞洲唔同地方，最後決定留喺香港發展，佢話昔日喺香港發展時，曾經住過劏房，佢指房間面積得3個榻榻米，房入面得床、洗手盤同廁所，被問到當年喺香港做模特兒時期嘅生活，藤岡靛話咩都會做，關於設計或者夜場打碟嘅工作都有做過，佢回想當時每晚返到屋企，睇住天花板就覺得好辛苦，覺得自己喺一個只係牆與牆之間哋方瞓覺。