蘇永康、蔡一智、周勵淇同張玉珊晏晝喺油塘社區中心出席長者活動，派月餅俾公公婆婆，其中蘇永康表示颱風「山竹」襲港時，正身在加拿大登台，佢話：「老婆喺屋企一早做好防風措施，仲用啲黑白色膠紙襯晒色咁打交叉黐玻璃，不過應該黐漏咗塊露台玻璃，所以當日晏晝被風吹爆咗，好彩當時囝囝喺房，老婆同外父即刻用啲紙皮頂住先。」除爆玻璃外單位亦一度停水，幸好最後已經全部搞番掂。

蘇永康話返到香港見到周圍仍然有好多塌樹個案：「其實香港實在太大根本做唔切，民政事務處佢哋其實已經做得好好，而且今次風災冇做得成重大傷亡，真係不幸中嘅大幸。」而蔡一智就表示喺颱風期間撞啱囝囝發燒，求醫無門：「冇辦法啦，唯有幫佢搽油飲水幫佢降溫，不過冇咩大礙，噚日已經睇咗醫生啦。」

另外，首次參與活動嘅周勵淇話：「難得今年有時間，中秋期間喺香港，所以就嚟陪下公公婆婆。」

精選娛聞，喺晒《娛果》
http://fb.com/appledailyent