Kelly近日回歸工作檔，忙於錄新歌、拍MV，人靚勤力，台上台下、家庭都打點得滿分，Kelly卻直認自己從來不是有計劃、有目標的人「其實我由細到大都好hea，好似發緊夢，見步行步嗰類。學生年代，好似乜都唔識咁，好多嘢諗，揀呢科，我唔掂喎，好低分；揀嗰科，我又冇興趣，終於揀大學真係要決定，我就覺得日日對住Art，我可以接受，所以就揀咗Art。」

**遇到好人多過小人**

隨遇而安，卻又幸運行到今天，Kelly於1992年在美國留學認識現時老公，又入行成為歌手，一切上天有安排，「其實我日日都覺得自己好幸福，除咗病嗰陣啦。咁多年，我係遇到好人多過所謂嘅小人，同埋人生真係充滿選擇，你用乜嘢角度去睇一件事，就會有唔同結果，樂觀嘅態度好重要。」

粉絲等待多時的新專輯，明年面世，Kelly說：「家不停追歌，追到就錄，暫時一首快歌，幾首慢歌，因為我都想填廣東詞，所以得閒就會諗吓有乜內容。」Kelly的演藝人生少不了經理人鍾珍，一直陪伴在她身邊，更是她心目中的女超人，「Superwoman一定係鍾珍，佢管理成間公司咁大，以前UFO咁多電影，除咗做我經理人，佢仲同時開緊三、四部戲，真係無所不能。」她坦言在鍾珍身上學懂許多做人處事，如何從多角度看待一件事，找到位減壓。

**消失的高踭鞋**

陳慧琳做了多年型媽，台上依然型格女人味滿分，隨着做了媽咪，心愛的時尚單品也告別衣櫃，「我啲高踭鞋呀，真係唔可以再着，平時去街，兩吋，兩吋半矮矮哋，後來減到一吋半，家直頭高踭鞋完全唔使買，因為係跑唔到，去旅行就一定波鞋。」至於平日工作買的高踭鞋，Kelly會在每兩年一次的陳慧琳慈善基金義賣時，清倉變作善款。

採訪：林妙萍
攝影：郭賢興
攝錄：周樂恒
剪接：李祉澄
服裝：Kate Spade New York
場地：Sky Garden, California Tower