何韻詩「十八種香港HOCC」演唱會前晚在伊館開鑼，開騷前何韻詩面對重重困難，紅館申請被拒，冇贊助、冇財團支持，冇任何物資，請嘉賓又遇上不少阻滯，幸好個唱結算收支平衡，總算執番身彩。

阿詩為了個唱歷盡千辛萬苦，她說：「走到呢步真係唔容易，但我選擇咗行呢步，因為我相信香港人。今次個唱帶出嘅訊息係有啲大，但我相信入嚟睇嘅現場觀眾嘅質素。其實喺我嘅音樂團隊，都有好多喺呢行好多年嘅人，可能都厭倦一直以來做嘅方式，一啲規則，睇吓可唔可以打破呢啲方式，原來真係可以做到，但一定有唔同代價。」其間有觀眾大叫：「撐住呀，唔好喊！」又有歌迷送上愛心紙巾，阿詩笑着回應：「做乜啫！我都冇喊！」場面溫馨感人。阿詩更請來內地搖滾教父崔健，透過視像隔空jam歌，阿詩說：「你哋都知我有啲地區係去唔到，所以用呢個方式合唱。好開心，我哋終於成功跨越到一條界線！」
阿詩完騷後接受訪問，提到一眾個唱嘉賓和鳴謝單位，艾未未和坂本龍一亦是鳴謝名單之一，阿詩說：「呢個都係我自己親手寫信，有啲有回覆，但夾唔到時間。」問阿詩同性密友鄧九雲有冇睇騷？阿詩鬼馬地說：「你哋唔見咩？有喎，成班台灣朋友都嚟睇。」
採訪：王連連　
攝影：陳慧安