日劇《海女》喺日本同香港都好受歡迎，仲帶挈咗能年玲奈、有村架純同福士蒼汰等人走紅。而有份演出嘅兩名80年代偶像小泉今日子同藥師丸博子，喺劇中嘅出色表現，更加令《海女》如虎添翼，佢哋兩位中女偶像鬥戲嘅場面，好多觀眾都話好精彩，因此，明年新年佢哋又有機會鬥戲，今次佢哋會拍新年特備劇，仲要扮演兩姊妹。

製作《海女》嘅NHK電視台，將會喺明年新年1月2日推出新年特備劇《富士家庭》，講一間喺富士山腳下，由家族經營嘅便利店嘅故事，藥師丸同小泉扮演兩姊妹，藥師丸係一個性格好正經嘅家姐，細妹小泉就性格開放，兩姊妹性格差天共地，當然會再鬥氣。今次兩位阿姐再碰頭，真係鬥氣兼鬥戲喇。