劉愷威同楊冪嘅婚禮將於本月8號喺峇里舉行,兩人選擇喺當地嘅五星級酒店BvlgariHotelsandResorts共諧連理,楊冪好姊妹唐嫣擔任伴娘。香港傳媒亦已經陸續抵達峇里,酒店保安方面非常嚴密,所有進入嘅車輛都需要喺酒店門前接受嚴密檢查,包括登記司機姓名,之後就要檢查車底同引擎。
度假別墅職員指出,酒店房間由1月6號起已經爆滿,職員直認酒店已被人包場,唔再接受租用,又向在場記者表示酒店係私人地方,拒絕讓記者參觀。
度假別墅大堂附近,經過一片樹林,就有個大沙灘,估計一對新人會喺沙灘行禮。
BvlgariHotelsandResorts每晚租金由8,500港元至55,000港元不等,背山面海,提供沙灘、水上、露台同涼亭四個不同婚禮場地,豪華又浪漫。估計愷威今次花過百萬搞婚禮。