中泰混血兒「仙樂都」吳堯堯（YoYo）今日喺北角出席泰國食品試食會，YoYo話啱啱噚晚先喺泰國返港，今次去係為攞返泰國嘅住戶証，佢話：「送咗媽媽返郷下，因為我喺香港出世，冇泰國嘅身份，攞香港身份證每次只可以逗留一個月，近期媽媽入咗4次醫院，我想留耐啲陪佢，見唔到佢咁點？媽媽已經70幾歲，年紀大，行動唔方便。」問YoYo有冇諗過返泰國定居同發展事業？佢就話：「佢哋一定要好流利嘅泰文，我係泰北嗰邊，係同曼谷有啲唔同嘅，我講得唔夠流利。」咁有冇諗住喺泰國置業？YoYo話：「我都想，要努力儲錢買，佢哋啲樓只係幾十萬就有，不過最想喺鄉下起屋，我有5兄弟姊妹，我排最細，喺嗰度已經有地。」