月前新東補選點票期間，新聞系大學生被禁止進入新聞中心記者區採訪，記者出身嘅公民黨議員毛孟靜認為政府做法影響未來新聞工作者培訓，於是去信民政事務委員會投訴。
民政事務局局長劉江華前日終於回信，話由於專上院校所辦嘅新聞刊物或電子新聞媒體嘅學生記者，唔係專業新聞工作者，專上院校都唔係大眾新聞傳媒機構，所以政府一向都唔會安排佢哋採訪記者會或官方活動。政府喺信中又話，為利便專上院校新聞系教學工作，嚟緊會積極考慮喺採訪場地整體情況許可下，有限度容許新聞系學生記者參與一啲重要採訪活動，當局會同專上院校商討詳情喎。