杜如風身為前嘉禾高層杜惠東嘅獨生女，杜惠東未退休前，係嘉禾負責宣傳嘅高層，專負責成龍電影宣傳，杜如風媽咪係中學教師。

自細杜如風已集萬千寵愛喺一身，大學畢業後，就返嚟香港做過電影編劇，大情大性且貪玩性格，令佢喺圈中人緣極廣，尤其與LMF成員、何超儀、陳奕迅夫婦、謝霆鋒、郭偉亮夫婦等人相熟，杜如風亦曾同馮德倫、Shine成員黃又南傳出緋聞。

比較少人知嘅係，杜如風曾經做過英皇電影公司做助導，所以同超儀、霆鋒識咗好多年，據知超儀當佢係「哎吔女」好錫佢；「哎吔阿哥」霆鋒都好照顧佢，又有阿徐及Wyman成為「fashion之友」，成日分享「潮人經」。

但2012年就爆出轟動娛圈嘅「飯局事件」，圈中人包括徐濠縈、何超儀、李璨琛同葉佩雯等捲入其中。當時盛傳杜如風都有赴會，不過佢後尾出嚟解釋、話自己當時喺北京拍攝《風行全中國》，而當晚徐濠縈亦公開飯局照片，證明杜如風根本就冇嚟，令佢免被捲入是非之中。