呢句唔係爛gag係歌詞，I believe I can fly！用嚟送畀國泰空中服務員工會最適合不過。工會最近換屆，13個理事會成員中，有5名新理事，全由年輕人擔大旗，包括新任副主席80後畢珮瑩。Silvia加入工會多年，舊年有份包圍國泰城爭取薪酬福利。原來佢舊年差啲想劈炮，因為心灰，「點解年年都要去爭取合理待遇？」
不過Silvia諗深一層，𠵱家冇集體談判權，第二份工可能遭遇一樣，反而國泰工會咁強大，點解唔親力親為？90後吳綺雯Yvonne中七畢業後就做空姐，滿腔熱誠，但不甘被壓榨，亦討厭飯來張口，乜都要人幫自己爭取，決心加入工會。佢哋遲啲會拍短片，介紹工會，講解勞權，咁多新諗頭，都係想多啲年輕同僚加入，壯大力量。

去信各黨　關注全民退保

經過去年包圍國泰城爭取合理薪酬待遇，工會會員人數增加約1,000人，現時有7,700人，佔整體空服員人數78%。「冧莊」擔任工會主席嘅黎玉嬋同八方講，工會希望喺社會議題上多發聲，稍後會去信各黨派，要求就全民退保及延長退休年齡等問題表態，之後會將結果製成單張，交由會員今年9月揀選心目中嘅立法會議員，「希望可以選到多啲關心打工仔嘅議員加入立法會」。
由國泰、港龍、英航及維珍航空員工組成嘅香港空勤人員總會亦最近成立，會員人數逾萬，理事會由各工會派代表選出，今年6月正式上任。工會總幹事吳敏兒話，日後各公司有突發事件或訴求爭取，空勤工會都會動員聲援。

李八方
mailto:[email protected]