【10:18】新增教育局對事件回應

有市民發現掛有「AM 4」車牌嘅教育局局長座駕，懷疑罔顧行車安全喺雙白線U-Turn掉頭。王先生喺周三晚7點幾揸車途經灣仔莊士敦道，前面一部私家車行行吓突然喺雙白線U-Turn，當時王先生好彩無跟車太貼免生意外，但佢望清楚對方車牌竟然係AM 4，即係教育局局長楊潤雄嘅座駕，就覺得好離譜囉！

王先生嘅車Cam拍低咗事發經過，當時喺周三晚7點13分，王先生揸車跟住部AM 4嘅車尾向銅鑼灣方向行駛，去到莊士敦道近譚臣道時，部AM 4竟然喺雙白線U-Turn。王先生話當時見到部AM 4打橫霸咗對面線，仲要褪尾先掉到頭，完全係唔依交通規則亂咁嚟。

事後王先生好勞氣咁同《蘋果》爆片，佢話雖然當時睇唔清楚楊局長係咪喺車上，但就覺得點解政府高官可以知法犯法？而對方從事教育嘅，咁點樣為莘莘學子樹立榜樣呢？

教育局局長新聞秘書回應有關片段時表示，局長當時不在車上，對事件並不知情。教育局正根據既定程序展開調查，並會採取適當行動。道路安全十分重要，局方對有關事件表示歉意。

你敢爆，我敢獎！ 立即WhatsApp《蘋果》24小時爆相爆片熱線 或致電：63836568