由韓國「國民MC」劉在錫主持嘅綜藝節目《無限挑戰》不知不覺今年已經播出10年咁耐，雖然節目多年嚟經歷過前成員Gill同盧洪哲先後因醉駕而退出嘅負面新聞，但仍然得到觀眾力撐。

今日下午《無限挑戰》就得到韓國放送協會頒發代表韓國電視人最高榮譽嘅「韓國放送大獎」，名正言順成為「國民綜藝」。

一眾主持人同節目導演都有出席領獎，導演表示因為有劉在錫、朴明秀、鄭亨敦等主持人以及所有幕後工作人員完美配合嘅關係，每個星期都帶住信心嘅心進行拍攝，而劉在錫喺導演發表感言時亦不時點頭認同。

之後到朴明秀講感言時，睇得出佢好興奮，講極都講唔完，搞到劉在錫都頂佢唔順，出手截停佢話唔夠時間，非常搞笑。