大陸女星吳謹言憑劇集《延禧攻略》魏瓔珞一角而走紅，人紅自然是非多，最近其工作團隊因溝通出錯，遭央視節目《中國電影報道》於微博公開批評，吳謹言雖已三度道歉滅火，未幾傳出廣電總局口頭通知各大影視公司要慎用呢個演員，之後就傳出有兩部電影傾緊嘅電影，最後都決定易角！

今日再有消息指，大陸導演管虎嘅新片《八佰》，原先屬意吳謹言任女主角，卻遭臨時易角，改由《甄嬛傳》嘅「祺嬪」唐藝昕演出。但《八佰》片方即於官方微博澄清，指吳謹言之前只係參與過電影嘅試拍。

管虎執導嘅電影《八佰》其實早於去年9月開拍，今年4月殺青，但演員陣容一直未有對外公佈，對於今日傳出易角一事，該片嘅官方微博發出聲明，回應吳謹言於電影《老炮兒》時與管虎合作，而《八》片未定任何演員時，需要進行開機前嘅試片拍攝，當時因吳謹言正於上海參與管虎監製、費振翔導演嘅電視劇《外灘的鐘聲》，劇組就邀請佢進行了試拍，但並非是確定嘅女主人選。而之前網上流傳嘅的所謂「先導預告」，就係片方嘅試拍片段。至於唐藝昕是否參演了該片，片方尚無明確說法。

精選娛聞，喺晒《娛果》
http://fb.com/appledailyent