韓國女星金泰希早前落實同韓劇《好醫生》男星周元合作拍攝SBS新劇《Yongpal》，不過近日就傳出換導演，令粉絲非常擔憂，而電視台方面噚日就大派定心丸，表示換人一事係導演嘅內部問題，唔關演員事，拍攝日程亦唔會受太大影響，而《Yongpal》亦預計接檔《假面》，於8月播出。

另外，由河智苑同李鎮旭主演、之前同樣鬧出不停換工作人員嘅SBS新劇《愛你的時間》將於星期六首播，劇組今日就一連公開兩張新海報谷劇。第一張就同上一次公開嘅海報係同一款，一樣係二人坐喺樓梯上晒溫馨，而另一張就係河智苑同李鎮旭各自於房間嘅窗口伸出頭，不過河智苑就望向遠方，李鎮旭就深情望實河智苑，海報上更寫上「習慣這東西真是可怕，因為它掩蓋了真實。」透露二人於劇中因長時間以好友相處而一直未能昇華為戀人嘅曖昧關係。