容祖兒(Joey)喺紅磡體育館舉行嘅15場跨年「1314容祖兒演唱會」,今晚喺紅館舉行最後一場,日前Joey氣管炎兼感冒,搞到聲帶沙啞,最終要打開聲針同針灸治理,經理人霍汶希(Mani)話祖兒有少少抑鬱,但可以應付。
Joey喺傍晚6點20分,喺紅館嘅停車場出現,為演唱會拜神。着住羽絨背心嘅祖兒精神尚算飽滿,笑容燦爛,不過為咗養聲,就冇接受訪問,亦好少同身邊人交談,佢經理人Mani同演唱會之父張耀榮同Joey一齊出席拜神儀式,在場有半百歌迷守候,Joey見到一眾歌迷,佢都有揮手打招呼,露出笑容,問到祖兒聲帶康復係唔係理想,Joey舉起手指公,示意狀況好好。
此時,大批歌迷大叫Joey加油,Joey亦趁機會走近fans接受歌迷送上嘅禮物,期間一度混亂,祖兒亦都先退後,待fans冷靜之後再近距離接觸,Joey大概逗留咗10分鐘,之後就返回紅館後台準備。
另外,祖兒經理人霍汶希(Mani)喺微博po上佢攬住祖兒嘅合照,加上「心痛」二字,同3個流淚喊晒嘅公仔圖案。相信最能夠接近同了解祖兒嘅,莫過於同祖兒關係密切嘅Mani,知道祖兒為今次15場跨年演唱會做到五癆七傷,氣管出現問題,兼且聲帶沙啞,祖兒都照頂硬上,Mani「愛莫能助」,當然非常心痛。