今日劉德華到樹仁大學出席畢業禮，獲頒授榮譽文學博士學位。進場時現場傳出歡呼聲，其實入場前沿路上已不少人舉手機拍攝。

儀式完成後，約下午四時十五分，華仔與陳兆愷法官現身拍合照，陳官未有受訪。問華仔被稱為「劉博士」後可感覺「飄飄然」？他笑稱：「冇，其實頭先台上一路講緊我台上嘅功績，我就曾經有諗過自己原來做過咁多嘢，自己都唔知，但係有付出過都係一件好事嚟嘅。我希望我可以做一個role model，俾到年輕人一個示範。」

但華仔都話聽到自己一連串功績期間，都曾有啲激動，但因為篇幅頗長，講咗好耐，「佢講得好長，所以有少少機會，有啲時間可以同台下互動下。」但華仔所講嘅「互動同交流」，其實都係點點頭、微笑一下，輕輕揮手咁。有人笑言獲頒博士銜頭之後會否趁機加片酬？華仔就話：「得嘅咩？得嘅咩？」

問華仔今日咁開心嘅日子，點解唔帶埋妻女嚟？佢笑一笑話：「帶佢嚟我驚搞亂檔。同埋個女都要返學。」又話未影相俾太太睇：「或者帶件袍返屋企同佢影。」想個女將來都成為博士嗎？「呢啲太遠喇！」如果真有此一天，華仔笑言：「到時請埋你哋嚟呀！」

成為博士之後，華仔表示會繼續致力慈善工作，但最希望是可以為同業出力、做多點事，「傳承我哋嘅文化，例如廣東歌同粵劇。」至於復工，華仔就話依家仲未開始正式接戲，最快都要等到農曆年之後再算。太太可會從此禁止佢拍騎馬戲，他笑言：「我幫你問下佢吓。」但他補充：「其實嗰件事之後自己都有陰影，仍然有啲驚，今次只係好彩，所以都唔會接住。」

猶有餘悸的華仔，依家睇番以前騎馬嘅相都有啲驚，「如果真係有戲份需要，可能都係要搵替身。」

更多娛聞，喺晒《娛果》
http://fb.com/appledailyent