當年今日
關於我們

【李八方online】葛珮帆倡減少依賴東江水 網民:搞港獨?

蘋果日報 2018/09/10 17:55

東江水葛珮帆李八方ONLINE

民建聯立法會議員葛珮帆去咗以色列考察,到訪當地的海水化淡廠,「葛博士」視察完畢,突然喺Facebook有感而發,話香港要增加淡水資源供應,「減低對東江水源的依賴,實在刻不容緩。」曾經叫港人「飲水要思源」、要諗下邊個供水畀香港嘅民建聯葛博士,唔知係咪喺度離間緊兩地人民之間嘅感情,竟然提出減少依賴內地嘅東江水?有網民質疑葛博士係咪喺度搞緊港獨。梁振英反對港獨,葛博士反對「港獨」嗎?
葛博士今次係參加由財政司司長帶領嘅商貿代表團訪問以色列,唔知係咪暢遊異國時太開心,唔記得民建聯喺東江水嘅堅實立場。葛博士話,香港要減低依賴東江水,仲話「期望政府能把好關,讓香港有穩妥的供水,市民未來不用捱貴水。」葛博士嘅意思,係咪即係話將內地東江水輸港,說成係無良奸商:「飲水要思源,評論要公道,這是做人的基本良知。」呢句金句係民建聯葛珮帆對支持東江水供港嘅有力註腳。
民主派以往要求搞海水化淡、減少輸入東江水等,民建聯反對。香港本土嘅毛孟靜曾經喺立法會提出「港人港水」議案,葛博士都係投反對票。如今呢個立場,難怪令唔少人都覺得好奇怪,甚至有人覺得葛博士好無恥。公民黨郭榮鏗都話,公民黨多年來力陳多個理據,包括應對氣候變化、比較自行開發水資源與東江水嘅成本等比較,不斷要求政府開發新水資源,減少對東江水依賴,不過葛博士嘅黨友就衝出嚟鬧,話提出減東江水嘅人係唔感恩,仲話唔買東江水,即係要閂香港人水喉,家陣葛博士咁講,真係funny。
empty
葛珮帆手持一杯海水化淡廠嘅製成品,呼籲香港要減少對東江水嘅依賴喎。(摘自葛博士Facebook)