當年今日
關於我們

隔牆有耳:政總多菌 人人自危 
奶媽狂包雲吞 民望高流鼻水 - 李八方

蘋果日報 2015/02/10 00:00


呢排流感高峯期,稍一不慎,好易傷身!八方聽聞,添馬艦政府總部近排變咗播菌地,因為有啲梁班子中人病倒了,鼻水流不停,開高層會議時好危險,個個都驚會被傳染,笑笑口話喎,係咪應該董太防護Look去開會?其中兩個嫌疑播菌者,就係政務司司長林鄭月娥同食物及衞生局局長高永文,唔通佢哋兩個近期逢騷必出,忙到甩轆,一唔小心中咗招?
日前政務司司長林鄭月娥出席中總舉辦嘅賀年活動時,雖然神色唔錯好精靈,同現場人士打成一片,但其間卻頻頻拭鼻「包雲吞」(圖),個鼻仔仲因此紅晒陰功豬。林鄭若然病倒,特區政府大鑊鳥,八方噚日特別向政務司司長辦公室人士打探,獲派定心丸,發言人話呀,林鄭呢兩日確然係有少少唔舒服,但絕對唔係嚴重,更加唔係流感,多謝大家關心。
馮煒光病到變聲
向來楚楚可憐feel、近排成日出嚟回應流感嘅食物及衞生局局長高永文,近日都被人見到流鼻水,唔通身為醫生嘅佢,能醫不自醫?八方向食衞局發言人問過,證實局長雖然近排係有少少流鼻水,但唔係流感,換言之大家唔使對民望高避之則吉。
據聞連蜜運中嘅新聞統籌專員馮煒光呢兩日都不敵病魔,猛流鼻水,病到聲都變埋。八方問過馮煒光,佢話飲多兩啖水、休息吓就冇事,八方相信佢都會戴罩確保身邊人健康嘅。
至於其他問責局長,普遍嚟講比較fit,好似財政司司長曾俊華、勞工及福利局局長張建宗以及政制及內地事務局局長譚志源,分別透過發言人回應話冇病冇痛,鬼打都冇咁精神。至於教育局局長新聞秘書,都話冇聽聞近日吳克儉有病喎。
李八方

mailto:[email protected]