自從無綫播出《流行首爾》之後，主持杜如風被網民封為「世界級港女」，又話頂唔順佢啲「港女」性格，講嘢冇tone、裝扮好騎呢，成為部份網民嘅狂插對象，有人仲話佢成日咁鍾意買嘢，質疑佢屋企係唔係好有錢，先成為「天生購物狂」。

其實，杜如風唔係大家想像咁「大富大貴」，用嘅、使嘅、基本上都係自己錢，以前佢都講過自己唔買嘢會身痕，中學擁有人生第一張信用卡，就碌爆咗！搞到爸爸媽咪好頭痕，每次碌爆卡嘅次數更多不勝數，後嚟佢媽咪要用到調低信用額，等佢碌唔到，爸爸退休前一直幫囡囡找卡數。佢都多謝個屋企人冇令佢破產，依家有收入嘅佢，又出旅遊書、寫專欄、出騷，搵搵埋埋應該都夠使。

但奇就奇在，杜如風從來唔會掉衫，覺得潮流係一個循環，有日會興番，所以《風行首爾》有集講佢同潮物店比拼勝負，點解會贏，好大機會，因為佢唔掉嘢嘅習慣，先令佢收藏咁多潮物。

杜如風講過阿媽成日同佢呻，如果佢唔買衫，分分鐘就可以買到層樓，據聞依家佢都有租單位自住，冇再塞滿屋企間房。