【智取大市】周期股不宜窮追(晉佳)
港股晉佳
市場憧憬聯儲局出年唔加息,以及預期12月15日中美貿談死線將不加徵新關稅,引發升市。睇恒指圖表,8月至今係一個輕微上傾上升通道,而非一個橫行通道,係一個唔覺唔覺靜雞雞嘅幾個月反彈市。
睇恒指,只升咗兩日,但係個別同外貿、製造業相關股,紙業股玖紙、理文由8月低位至今升咗五成都唔止,5G概念股瑞聲更由低位升一倍,周期股累積升幅並不低,某程度反映投資者對於內地經濟回穩信心由睇淡,升溫至半信半疑階段。恒指幾個月拉勻冇乜郁,原因係本地概念股因抗爭運動受創拉低咗,加上藍籌太多廢老股,睇返一批體質正正常常中資周期股,期內普遍上升。所以,港股呢兩日升市絕非由低位突破,而係持續升咗一段時間,而家去買周期股並非突破追入,而係高位追貨。
大市要由現水平明顯再升,就要市場對內地經濟回穩嘅信心由半信半疑提升到高機率。牌面睇,各界預期出年GDP勉強保六,通脹喺今年豬價嘅高基數下,明年低啲亦唔慌低得去邊,中國好大機會持續低實質增長。低增長配以低估值合理不過,而現時市場情緒以至周期股估值,相信算處於低增長預期之下嘅中高股價範圍。
港股升市之中,主板成交破900億,比起近期平均水平明顯增加。由8月至今,每逢單日成交明顯增加,引到新錢入場接貨,單邊升勢就會作結,好則改為反覆上升,衰則重拾跌市。呢一刻暫不期望有單邊升勢出現,市場亦難以一下子對經濟回穩回復一定信心。因此,周期股追不過。
假設市況未至好差勁,繼續浮浮沉沉,近期調整後嘅生科股或者重新獲得留意,康希諾(6185)同錦欣生殖(1951)已見回穩,稍後或能重返高位。
https://www.facebook.com/advanceguy1