開始時就話班市民要求減電費,之後局長就出嚟順應民意,重加上環保條件,擺明係開天殺價。正路發展就係靚太高層反對然後膠着,經過一波三折最後戲劇性大團圓結局。今次靚太高層同局長,兩位主角嘅戲份配合得好好,主角演技亦無懈可擊,惟獨係劇本太過表面化。編劇可能對市場運作認識唔深,所以先至會寫出有嚴重犯駁嘅劇情。
首先,靚太高層反對降低保證利潤,人在其位講呢句說話好合理。不過靚太高層反對環保條件就奇怪啲,因為政府開出苛刻環保條件,新競爭者就更難打入香港市場。站在靚太高層立場,照理會揸住環保工作大做文章,講吓佢哋公司又幾好幾犀利,又講吓政府點解應該要畀佢哋繼續服務九龍新界,甚至服務埋香港居民,乘機搶攻道德高地同埋市場佔有率。再講,無利潤保障靚太高層間公司一樣可以供電,而且更加無拘無束㖭,靚太高層又使乜驚青!靚太高層嘅獨白太過對抗,反而削弱可信性,編劇要好好修改呢部份。
至於局長,演技爐火純青不在講,最好嘢係可以面對公主CEO嘅演技竟然可以忍到唔笑,重可以繼續交足戲。呢啲老戲骨香港走一個少一個,政府要好好留住人才,唔好畀局長去咗人家度打工先至係路。
利世民