【李八方online】段爸又上榜 獲封高教界年度人物
蘋果日報 2019/12/17 21:11
中文大學Times Higher Education李八方ONLINE段崇智
「段爸」中文大學校長段崇智上個禮拜獲選2019年度美國解剖學家協會（AAA）院士，今個禮拜又報喜，獲封《泰晤士高等教育》（Times Higher Education，THE）2019年全球高等教育界11個年度人物之一。《THE》亞洲地區編輯Joyce Lau對段爸有好高評價，雖然香港多間大學校長都有就反修例示威出過吓聲，但冇一個好似段崇智咁挺身保衞校園同學生。
Joyce Lau話，11月中大曾經「儼如戰爭地區」，喺新聞片段睇到段校長嘗試喺示威者同警方之間斡旋，希望尋求和平解決方案。不過警察無理會校方善意、出爾反爾，更加擺明對住段爸同其他職員大放催淚彈。
事實上，「段爸」美名早喺二號橋一役之前誕生，Joyce Lau都特別提到，段校長早幾個月已經有同學生接觸，聆聽心聲，Joyce大讚段爸就算不斷被建制人物點名批評，仍然努力取平衡。段爸亦都發表過萬字公開信，羅列收到學生受警暴情況，表明願意同學生一齊投訴到底，唔少中大學生同舊生睇信睇到喊晒㗎。
段崇智獲《泰晤士高等教育》選為2019年全球高等教育界11個年度人物之一。《泰晤士高等教育》網頁截圖