七一遊行驚天動地，餘震未完。富豪團訪京，蒙胡總接見，同時亦公布中聯辦執位，由國務院新聞辦副主任李剛、外經貿部部長助理郭莉，同埋中聯辦九龍工作部部長周俊明，齊齊出任中聯辦副主任。
呢個時候中聯辦人事變動，已經好敏感，更加嚟料嘅就係，今次嘅三名副部長，李剛同周俊明都係共青團派官員。另一個郭莉，出身外經貿部，呢個系統，亦係朱鎔基同吳儀嘅碼頭。

共青人馬主掌收風
中聯辦7.1報錯料斷到正，呢樣就係人都知。更加令人惋惜嘅就係，7.1之後，中聯辦對7.1遊行都重係餘怒未消，不但將參加遊行嘅香港各大導演列入黑名單，話唔歡迎佢哋北上拍戲，重由高祀仁出面警告：香港係一個經濟城市，唔好搞咁多政治；副主任鄒哲開重得人驚，話好擔心香港會發生文革㖭。
不過，跟手阿董嘅前大內國師葉國華就撰文駁斥肥高，話香港唔單止係一個經濟城市。《鏡報》嘅巨型左炮徐四民重話香港唔會爆發文革㖭。嘩，愛國陣營有力人士對中聯辦咁樣正面駁嘴法，十幾年都未見過。試想想，嗰陣時周南、肥仔張等人噬起棚牙，出句聲就威風八面，即是代表中央批緊肥彭、批緊民主黨同港英，除咗肥彭，邊個敢窒番轉頭？𠵱家唔同嘞，好多人都聞到陣味。朱鎔基頭馬徐匡迪重話：7.1遊行係壞事變好事，咁就即係話中央對於7.1遊行及以後嘅事態評估，好有理性，唔同中聯辦郁吓就大嗌文革就快重演，中央冇俾佢拋窒。

曾慶紅高調蒲頭，胡錦濤所控制嘅共青團派，就即時向中聯辦灌漿攝住，即是以前阿老毛所講嘅「摻沙子，挖牆腳」戰術。中聯辦有共青團派兩名得力人物主掌收風，咁啲情報向上扒時，好似黃大仙同觀音廟咁，分別有兩張神枱，嗰炷香將會隨風飄去邊一邊，重使講咩？
但呢個形勢可能會好蝦香港下低嘅愛國團體仰觀天象嘞，唔知道上京由曾副主高調接見更加尊重，抑或恭聽錦濤哥嘅訓示至係更加幸福。三大副主任，講到明兩個係團派，加埋廣東省新任省長黃華華，又係團派，點樣先至叫做知碇，都已經好明顯啫。一團和氣？又未必，沙士嗰輪，中央炒咗老江御醫張文康外，重陪多個一上台就自稱團派重大擦錦濤哥鞋嘅孟學農㖭。
條電線千祈唔好插錯插蘇，因住wok數唔同，分分鐘燒灰屎，輕則停電，重則可能會火燭㖭，國家搞到我哋愛國同胞個心有少少亂亂哋。
至於阿鄒哲開，根據以往愈左愈襟撈嘅定律，反為個位最老定㖭。連李鵬喺六四以後都玩足十四年先至「全退」呀！


傳真︰2623-9278
電郵︰[email protected]