女長毛雷玉蓮喺反世貿示威中勇救俾韓農生擒嘅香港警察，又同南韓示威攻擊隊領袖郭魯忠做咗朋友，得到郭魯忠相贈反世貿戰衣，佢噚日着住件戰衣走去撐韓農，都唔知幾咁溫馨。高大有型嘅郭魯忠喺上個月反世貿示威當中負責帶隊衝擊警察，重成功突破警察圍捕，順利返到南韓。
女長毛噚日講起郭魯忠，就好似成個小fans咁。女長毛話世貿會議期間，佢日日拎剪報畀示威者睇，同佢哋熟晒，重好難得咁同郭魯忠合照，佢拎住張相好開心咁話畀八方知，郭魯忠唔係咁易同人合照。佢又話身上件反世貿背心都係郭魯忠送畀佢，至於係咪郭生着開嗰件，女長毛就笑笑口話呢個係秘密，唔會講畀人知。衰鬼，又真係幾有神秘感喎！

傳真︰2623-9278
電郵︰[email protected]