林建岳嘅寰亞公司現時擁有杜琪峯同劉偉強兩位大導演外，仲有舒淇、鄭秀文、劉德華、楊千嬅、余文樂、吳彥祖、黃曉明同高圓圓等紅星，原本舒淇想跳槽華誼，但經過岳少親自出馬游說後，答應畀佢開工作室，以後自己話晒事，舒淇終於答應續約啦！

一齊搞工作室

搞掂舒淇後，岳少最近又親自同甄子丹傾合作，聽聞佢答應同子丹一齊成立工作室，以後子丹工作室想開戲，岳少都會出錢支持佢，而每部戲又保證畀佢有3,000萬人民幣片酬，喺家咁嘅市道仲肯畀咁高片酬，又難怪子丹肯俾一間公司綁住。以後子丹接出面戲都要同寰亞公司合作，之不過蕭定一公司嗰套新版《急凍奇俠》因為係之前接落，就唔受影響。
噚日馮仁昭問岳少子丹係咪加盟寰亞？佢話：「好開心同甄子丹傾緊合作計劃，遲啲會有公佈。」家子丹同老婆仔女去咗旅行，日內先會返港，預計11月開拍《急》片，部戲定咗由羅永昌執導，其他演員有范冰冰。