政府又搞舊意思,開咗個「經濟定位高峰會」,由唐唐同阿董等齊齊訓話,一致睇好前景,一個話通縮期就快結束,反而要驚通脹,另一個就話,要「背靠祖國,面向世界」,國家支持香港,就快又有好消息。
首先,通縮期真正結束未冇人知,反而會有通脹?即是話一個細蚊仔瘦到長期營養不良,𠵱家醫生話:好嘢,就快有麵包嚟嘞,你有得食嘞,不過就要小心消化不良,要諗定點樣減肥喎,使唔使我教定你纖體呀?咁樣講,係咪有少少變態呢?
個經濟搞到咁,餓足咁耐,望都望有通脹喇。至於「背靠祖國,面向世界」,咁就重好笑,香港啲食水生豬,由大陸運來凡幾十年,一向都係背靠祖國。不過可惜近七年來,香港已經移咗位,乜都扯阿媽裙邊,同成個世界脫節,變咗「背靠世界,面向祖國」。