法國5月藝術節同康文署破天荒合作,喺香港文化博物館搞「羅浮宮的創想.從皇宮到博物館的800年」展覽,希臘出土嘅馬首雕塑(塑像殘件)、拿破崙徽號地毯等都係重點珍品,雖然展期有成3個月,但噚日展覽第一日開放都吸引20、30人排隊入場,有參觀者就話怕遲啲太多人嚟趁墟,寧願提早嚟參觀。
今次展覽分兩個展館同一個互動區域,放咗藏品嘅展館唔畀影相,雖然展區入面列明禁止攝影,仍有唔少人犯規用手機左影右影,由於有時人流較多,保安都冇佢符。
惟獨互動展區就可以影,所以唔少互動展品都成為拍攝對象,其中配合唔同香港場景,如搶包山、天壇大佛等嘅電子版「蒙娜麗莎」最受歡迎,唔少人輪流同佢瘋狂自拍。